দুপৰীয়া এটাৰ কথা

জুলী কোচ

কাঠৰোকাটোৰ মাতে গোটেই দুপৰীয়াটো

নিজৰ কৰি লয়

বাৰীৰ ঢাপৰ শিমলুজোপাত

ভোকৰ পোক বিচাৰি

টোকৰ মাৰোতেই নিজম দুপৰীয়াটো

খৰমৰাই উঠে শুকান সৰাপাতত

শিপিনী বলীয়া মন

লৱৰি বহেগৈ তাঁতৰ পাতত

গৰকাৰ তালে তালে মাকোটি নাচে

দোৰ্পটিৰ কোবত ঘৰচিৰিকা উৰে

জেতুকাপতীয়া জীৱন

বুটা চানেকীয়া সপোন ৰচে

ভঁৰালৰ মুধত এহালি পাৰৰ চেনেহা চেনেহী

চকুৰ আগত ভাঁহে ছকামকাকৈ এখন ছবি

গৰকি অহা কোনোবাটো দিনৰ

আনমনা মন মাকো সৰি সৰি পৰে

শালিকীজুটিয়া ভাঙোতেই বেলি লহিয়ায়

সময়বোৰ গুচি যায় সৰাপাতৰ বাটেৰে

কুঁহিপাতৰ আশাৰে

কাঠৰোকাটোৰ মাতে চ'তৰ দুপৰীয়াটো জয়াল কৰি তোলে।

::x::x::x::

---

Poet Julee Koch

lives in Nazira, Sivasagar, Assam

[Disclaimer: The opinions expressed in our Blog are those of the author(s) / poet(s) and do not necessarily reflect the opinions of the Publisher.]